ر واية أحلى صدفه بحيآتي الجزءالرآبع والثلآثون..

الجزء الرابع والثلاثون.....


ماجد: معقوله فواز يسوي كذا بدون سبب..
العنود: ايوه بدون سبب..
ماجد: بس اكيد فيه شي..
عبير: وهذا اللي نبيك تعرفه..
ماجد: صح تذكرت اليوم قال لي شي عنها..
العنود: وش قال..؟
ماجد: كنت اقوله اذا ما تحبها طلقها هو انصدم ..وقال لي اطلقها؟؟؟..قلت له احسن من انك ترميها ..قال ومن قال اني انا راميها..قلت اجل اللي انت تسويه شنو قال اربيها..
عبير عصبت: وش يبريها هي بزر عنده..
ماجد: سألته نفس السؤال قال اذا تزوجت هذيك الساعه بتعرف..
العنود: بدور متربيه قبل لا تعرف وجهه...شايف نفسه هذا على ايش..والله فقع مرارتي..
عبير: انت اقعد معاه اليوم .ولازم تعرف وش قصته ..وتكلم معاه بأسلوب يخليه يفضفض لك..
العنود: والله ما يعرف هالحركات الا وحده..
عبير: رغد..
العنود: ايوه رغد ما شا الله عليها تعرف هالحركات..
عبير: اتخيلك ماسكه فواز من شعره وتقولين له تكلم احسن لك اعتربني وحده من خواتك ولا ترى بتشوف رقبتك قدامك..
ماجد: حشى الvip مو العنود..
عبير: هذا الحين بأسلوب لو مو اسلوب كان الحين هو في المقبره..
العنود: تطنزوا تطنزوا..عاد انتي يا ام الاسلوب..
ماجد: بتقعدون تتهاوشون الحين..ترى بروح..
عبير: لا تنسى ضروري اليوم تقول له وبكره بينا لقا اوكي..
ماجد كشر: يعني بشوفكم كثير..
العنود: خواتك تحمل..
ماجد: الله يعين ازواجكم..ما ادري وش بيصير فيهم..
العنود: بيكنون اول حالات انتحار في المملكه...
عبير: ههههههه بس هذا زوجك..
العنود: لا انتي زوجك بيقولون عنه اشعل في نفسه النار ورمى نفسه من الفيصليه هههههههههه..
عبير: بسم الله عليه..
ماجد: من هو؟؟
عبير: وانت وش عليك ..رح بس ولا تنسى هاه..
ماجد: راح اوكي..
العنود تتمليح عند عبير: عبير مين تكفين مين اللي تفكرين فيه..
عبير: واحد ما تعرفينه..
العنود: كذابه..
عبير: كيفك لا تصدقين..."ومشت"
العنود: يعني ما في امل تقولين..
عبير: ولا خديجه ختى..
العنود: يا شينك..
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
محمد جالس مع لين ...ومشعل عند ابوه يكلمه....
محمد: ليونه..
لين بدون ما تطالعه تطالع مشعل: نعم..
محمد: ما دريتي...
لين لفت عليه وتناظره بنظرات استحقار: عن ايش..؟
محمد: عن مشعل..
لين بدى الاهتمام عليها:وش فيه..؟
محمد:مشعل شايفه كم مره جالس مع وحده..
لين بصدمه: وحده..
محمد: ايه وحده اجل واحد..
لين: ومين هي؟؟
محمد: وحده تعرفينها بالمررررررره..
لين: اعرفها انا؟؟
محمد: شكلك صقهى وما تسمعين..
لين: من هي؟؟
محمد: فكري انتي فيها...
لين: مافي غيرها..انا كنت حاسه والله كنت حاسه..
محمد استغرب: مين هذي اللي كنتي حاسه فيها..
لين بكل حقد: شهد بنت فواز..
محمد مات ضحك:شهد هههههههه شهد مره وحده هههههه..
لين: يعني مواهي..
محمد: لالا راح بالك بعيد..هي وحده عمرها حول 12 و11..
لين بتفكير: عمرها 11و 12...اعرفها زين؟؟
محمد: ايه زين..
لين: ما فيه وحده بالعمر هذا..طيب تعرف اسمها..
محمد: اعرف اسمها..
لين: وش اسمها..
محمد: اسمها...اسمها "وكتم ضحكته"..اسمها لين ههههههههههههههههههه..
لين عصبت: صدق انك بايخ وسخيف وسامج وما عندك أي ذرة من خفة الدم يا ثقيل الدم..
محمد: احسن تستاهلين هذا اللي ما يثق في حبيبه..بأعلم مشعل عليك<<يبي يرفع ضغطها.
لين خافت: لالا تكفى لا تعلم..
محمد: الا بعلم..
لين: محمد تكفى لا تعلم..
محمد: بشرط..
لين: لك اللي تبي..
محمد: جيبي البلاي ستيشن المحمول حقك والجيم بوي ..وامممممم وسوي لي بوب كورن يله بسرعه ولا علمت عليك..
لين: ا نشا الله هذا انا قايمه"وراحت"
محمد: يا حليلها خبله ا نشا الله تحبني وحده مثلها خبله وتموت فيني..
جاء مشعل: وش فيك انت ولين هواش...
محمد: أدبتها لك..الحين بتسوي كل اللي نبيه..
مشعل: ليش وش سويت..
محمد: هبلت فيها..بعدين اقولك بس الحين تأمر عليها وهي تنفذ..
مشعل: لا حرااام عليك اذا تحبني حرام اللي اسويه فيها وتراني اغليها..
محمد: اترك عنك حركات المراهقه ووسع صدرك وخلك معاي والله تنبسط..
مشعل: يله وش ورانا..
محمد: كفو والله..
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&


رغد واكبر علامة تعجب فوق راسها: قال اربيها؟؟؟؟
ريم: يبربيها ليش هي وش مسويه له...؟
العنود: علمي علمك..
رغد: غريب مره غريب مستحيل تسوي بدور شي يضره او يأذيه او حتى يزعله..
عبير: وهذا اللي قاهرني بدور ما تزعل نمله تخاف عليها وشلون زوجها وحبيبها...
العنود: انا متأكده انه شايف نفسه عليها لانها معطيته وجه...
رغد: احتمال جائز..
ريم: بس مهما كان ما يعاملها بالاسلوب هذا اكيد في شي اكبر..
عبير: بنعرف ا نشا الله كل شي الليله..
العنود وريم بصوت واحد: وش يبصبرنا؟؟؟؟
رغد وهي تضحك: روحوا دوروا لكم شي يسليكم..
العنود: اقول خلونا نتمشى عند البحر...
رغد: أي والله خلونا نروح البحر وافضفض له عن همومي..
عبير: الله واكبر وهمومك الحين اللي يسمعها يقول مطلقه وعندها 12 بزر وما عندهم بيت ولا تدري وش تعشيهم..احمدي ربك بس..
العنود: وبعدين وش همومك تكفين...
رغد: انتي واختك اول هم بحياتي وبعدكم تجي هذي النشبه"وتأشر على ريم"
ريم تتمسكن: افا انا هم ما عليه يا اختي مقدره حالتك النفسيه وما راح ازعل..
رغد: امزح يله بس خلونا ننروح ننادي البنات ونطلع..
ونادوا البنات وطلعوا الامهات..
رغد: ريم اتذكر اني قلت البنات فجأه صاروا حريم..
ريم: كل شي جايز بهالدنيا..
العنود: وش جابهم ذولي...
عبير: استحي على وجهك امك معاهم..
العنود: ايه امي وش جابها..
ريم : عنيد اسكتي فشلتينا..
ام مشاري: بنطلع معاكم..
رغد: حياكم الله..وين البنات؟؟
ام ماجد: بيلبسون عباياتهم ويجون..
ريم: يله مشينا..وهم بيلحقونا..
ومشوا ومروا من عند مجلس الرجال وهم يشوفونهم والبنات ما يشوفونهم عشان الزجاج عاكس..
مشاري: مشا الله كبروا بناتنا بسرعه...
وليد: ما سمعت باللي يكبرون كل ساعه..هذولا خواتنا..
طلال: مشا الله كلهم بنات عماني..
مششاري: وخواتك بس انت اذكر الله...
طلال: مشا الله..
سليمان يطالع ريم: طالع الزين كيف يمشي..
تركي: في احد يطالع البقره ويترك الغزال...
سليمان: ما في ثور الا انت ومرتك البقره.
نواف صاد وجه عن القزاز بالمره ولاهي في جواله عشان فواز اللي كان يطالعه هو بالذات...
نواف يهمس لسعود: سعود..سعود شوف كيف يطالعني..
سعود: لالا خلاص بعد شوي بنطلع هذا ما راح يتحملك ولا ثانيه..
نواف: المشكله شوف تريك وسليمانوه ما قال لهم شي وانا بالذات قال لي ليش؟؟
سعود: تركي وسليمان صاروا حسبت اهلهم وانا وانت ما زلنا اغراب عنهم..
نواف: يا ليتني ما طالعت بنتهم وافتكيت..
سعود: معليش..بعد عشر دقايق راح نطلع حتى لو ما سافرنا بنحجز بفندق ثاني..
نواف: ايه يكون احسن بعد..
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&


وصلوا الحريم مع بناتهم للبوابه اللي تطلعهم للبحر وفتحوها كان منظر البحر شي خطير كانت الانوار الصفراء حوله مع صوت البحر وهواه الرطب يحسسهم بالانشراح..راحوا الحريم يتمشون البنات كانوا مجموعه ولما لحقوهم البقيه افترقوا مجموعات مثل كل مره بس اللي تغير ان مها جالسه مع ريم لحالهم وبدور والهنوف وعبير ورغد والعنود مع بعض وفجر ونوف وشجون مع بعض ..كانوا حول بعض..هم كذا يحسون ببعضهم وهم بعدين بالمسافات لكن بالقلوب قراب بالمره..كلهم روح وحده وقلب واحد في اجسام كثيره..صحيح هواشاتهم كثيره وشخصيتاهم مختلفه لكن مع هذا كل وحده تكمل الثانيه ولو تنقص وحده منهم حسوا بالفراغ...
ريم جالسه مع مها وتحس انها لغز كبير وفي داخلها اشياء كثيره ودها تكتشفها..
ريم: متى نجلا اختك تزوجت..؟
مها: من يوم كنت بثالث متوسط..
ريم:يا عمري والحين لحالك..
مها: ايوه لحالي بس تعودت..سليمان ومحمد وعبودي اخوي الصغير مالين علي حياتي..
ريم: كيف نظامكم في البيت ومعليش على القافه اذا في سؤال ما عجبك ترى عادي ما تجاوبي عليه..
مها: هههه لا عادي اصلا انا ودي اسولف..
ريم: اجل مادمك ودك تسولفين ابشري بخليك تقولين لي سيرتك الشخصيه كلها..
مها: ههههه ابشري مع اني احس انها ما راح تهمك..
ريم: بالعكس يا قلبي الحين انتي وحده منا وفينا وربي اني اعدك بحسبة اختي رغد..
مها: تسلمين يا قلبي حتى انا ما اعدكم الا خواتي.
ريم: تسلمين..المهم تكلمي عن نفسك عن اهلك ..كل شي..ترى احب هالاشياء..
مها: اممممممم انا من يوم صار عمري خمس سنوات تيتمت"سكتت شوي تبلع عبرتها بعدين كملت وهي تطالع البحر" امي كانت ماخذه دور الام والاب والاخت وكل شي بالنسبه لي..كبرت انا وكبرت نجلاء اختي وسليمان اخوي...نجلاء شالت جزء كبير عن امي..مثلا شغل البيت واحنا البزارين ..وامي كانت تشتغل تبيع اكلات شعبيه لان راتب ابوي ما يكفينا وترفض ان سليمان يلهى عن دراسته بالشغل...لحد ما كبر سليمان وصار بالمتوسط وصارت امي تعتمد عليه اكثر من اول...صار يسوق يجيب لها اغراضها ويودينا ويجيبنا ويطلعنا..تحمل مسؤليتنا من يوم كنا صغار..صح اني اكبر منه بسنه بس احس اني طفله.. وهو على طول صار رجال وكأنه اكبر مني بسنين...وصل للثانويه وصار يدرس الصباح ..ومن العصر لما الليل يشتغل..طبعا امي ما اقتنعت انه يشتغل لما دخلت المستشفى من التعب والشغل...سليمان ما سكت وقال لها انه صار رجال ولازم تعتمد عليه وترتاح...تزوجت نجلاء اختي وتركت فراغ كبير بحياتي بس ما كانت تفارقني ابد..اذا ما شفتها تتصل..وترسل لنا دايما فلوس مع ان محنا في حاجتها .واذا احتجنا أي شي توفره لنا..وزوجها مره حبوب وحسبة اخونا الكبير بس سليمان ما يرضى ياخذ منه ريال واحد...
ريم تذكرت سليمان يوم كانوا في المدرسه وابتسمت..
والحين تحسن وضعنا كثير عن اول ..سليمان اشتغل في شركه راتبها مره حلوا وينفع وانا دخلت الجامعه وصرت ادّرس في معهد كمبيوتر ويدخل علي كويس...
ريم راح صوتها لانها كاتمه العبره: ما شا الله عليكم اخاف احسدكم على طموحكم وتحديكم واصراركم الي ممكن يكون معدوم عندي...
مها: كذا الحياة على ما تعودك...
ريم: طيب بسألك سؤال ترى مو ضروري تجاوبي عليه..
مها ابتسمت: قلت لك خذي راحتك..
ريم: كيف علاقتك بأبوك..يعني اشتقتي له وودك تشوفينه...تتخيلين لو كان عايش وش راح تكون حياتكم..
مها: اكيد فكرت في هذي الاشياء في البدايه كنت اكره ابوي لانه راح وتركنا ما كنت افهم..كنت لما اشوف امي تتعب في البيت والشغل اكره زياده..لما اشوف نجلا يغمى عليها كثير عشان عندها انخفاض بالضغط ومن التعب على طول يغمى عليها كنت اكره اكثر .ولما كنت اشوف سليمان اخوي يطلب من امي شي بسيط وما تقدر تحققه له اكره اكثر واكثر..بس الحين اتمنى انه عايش الله يرحمه..اتمنى اني اقول بابا..نفسي اقول بابا ودني الملاهي..بابا اشتري باربي...بابا شوف محمد يضربني..حتى لو اني كبيره بس هذا الاحساس معاي من يوم كنت صغيره..شي محرومه منه وموجود عند الكل حاولت اعوض فقدان ابوي كثير بس ما لقيت احد يحل مكانه الا شخص واحد صار لي ابوي واهلي كلهم بعد امي..
ريم: سليمان صح...
مها: ايوه سليمان...لو يصير له جرح بسيط اخاف عليه..واخاف اني افقده..اخاف اني ما عاد اشوفه مره ثانيه....اخاف انام وبكره اصحى وما احصله ..ما ادري ليه افكر كثير بهذا الشي..بسم الله عليه الله يحفظه ويخليه لنا...
ريم: امين...
مها: سليمان حبيبي عوضني عن اشياء كثيره بحياتي يسأل عني ويهتم فيني يحبني ويدلعني وما يرد لي ولا طلب لو اطلب عيونه...
ريم: عشان كذا انهرتي لما صار له الحادث..
مها: مو انهرت بس حسيت اني بموت..تصدقين يا ريم وادري بتقولين مجنونه..فكرت لو مات بروح ارمي نفسي لسياره والحقه...
ريم: لا صدق مجنونه..
مها: ترى الشين فيني متعلقه فيه بزياده يعني الله يعين زوجته بنشب لها..
ريم: زوجته بتحطك بعيونها ان شا الله..
مها: وش دراك يمكن تكرهني..
ريم:متأكده ان اللي تعرفك مستحيل تكرهك..
مها: والله ان كلامك عسل..اجل ليش نوف دايما تحشك وتقول ما عندك اسلوب..
ريم: نويف الشينه قايله عني كذا هين اوريها..
مها: لالا خلاص هونت امزح..
ريم: لا ادري انها تقوله..قولي لها مخليه الاسلوب لك..
مها: هههههه تصدقين حبيتكم وتعلقت فيكم...
ريم: وحتى احنا كمان تعلقنا فيك... خلاص من اليوم ورايح..من يوم نرجع للرياض بتروحين وبترجعين معنا...انتي مو نفس جامعة عبير..
مها: امبلا معها بنفس الجامعه بس ما اشوفها كثير..
ريم: اهم شي انك معها..يعني بترجعين معها لبيتنا..
مها: من الحين خططتي وخلصتي.
ريم: انا كذا احب اخطط لكل شي...
مها: واضح عليك انتي والعنود شخصياتكم قياديه..
ريم: انا والعنود تقربيا نفس الشخصيه بس هي قساها زمانها..صار لها موقف يوم كانت صغيره اثر عليها لحد الان...
مها: العنود؟؟؟...يعني ما كانت كذا..
ريم: لالا ما كانت كذا..
مها: ممكن اعرف وش الموقف اللي صار لها...
ريم: الموقف لما كانت بأول متوسط..كانت مره دلوعه وكيوت وشعرها نفس الحين قصير بالمره بس كان مقصوص بدلع...في يوم من الايام تعرضت للتحرش في دورات المياه الله يكرمك..وقعدت تصارخ وتنادي احد يساعدها بس لا حياة لمن تنادي..كانوا بنتين يراقبونها من ايام لما جا اليوم اللي طلعت من الحصه لدورات المياه وحجروها في زاويه ومثل ما قلت قعدت تصارخ وتستنجد باللي حولها بس محد سمعها ولا سمع دموعها وصرخاتها..كانوا خلاص ناوين ينهونها الا دخلت وحده من طالبات ثالث...هم اخترعوا ما توقعوا ان احد راح يدخل عليهم قامت البنت طلعت وصارت تصرخ لما جاوا الإداريات ..اخذوهم واخذوا العنود...قعدت العنود بعدها شهر ساكته من الصدمه..وما صارت تروح المدرسه...خالتي سحبت ملفها من المدرسه وقررت تنقلها وحده ثانيه..والبنات فصلوا وما عاد تقبلهم أي مدرسه ثانيه...وهذا الموقف اللي حصل لها ..وتغيرت من بعده...العنود بعد فيها ميزه انا اوقف وادق لها تحيه..العنود دايما مضحيه..ياما مواقف صارت لنا ومشاكل نتورط فيها..تدافع عنا وتقول انا السبب فيها قدام الكل وبجرئه عشانا احنا ..عبير ورغد وانا ما يصير لنا شي..بصراحه دايما وابدا احيي شجاعتها حبيبة قلبي والهر..
مها: ومن بعد هذا الحادث صارت كذا...
ريم: ايوه تحس ان الدلع والهدوء ضعف وانه ما يمشي بالزمن هذا الا القوي واللي الناس تهابه..ترى هي قويه من برى بس لكن من داخل هشه بسرعه تنكسر وكمان تبكي من داخل لان الدموع على قولتها مو لها..
مها: مسكينه يا العنود ما تستاهلين..
ريم: ايوه مسكينه في كل شي..حتى في حياتها العاطفيه مسكينه..
مها: ليش؟؟
ريم: بقولك بس بليز ما يطلع ولا حرف من اللي بقوله..
مها: اكيد يا قلبي..
ريم: الشخص اللي حبته العنود اكتشفت ان عبير تحبه..
مها انصدمت:وعبير عرفت..؟
ريم نزلت راسها: لا ما عرفت ولا تبيها تعرف.
مها: اكيد بتضحي عشان اختها..
ريم: هذا اللي انا متأكده منه..الحين هي تكابر وتقول انها راح تواجه عبير وتقولها انها تحبه..بس ادري ان هذا الشي مستحيل يصير لو على قص رقبتها..
مها: طيب ليش هي اللي تضحي دايما..ليش ما تدافع عن حبها على الاقل..
ريم: هذي العنود اللي في ايدها وقلبها مو لها...مسكينه بنت عمي..
مها: بس انا من راي ما تسكت..
ريم: يا بنت..العنود بسم الله عليها تدبر نفسها...خلينا نروح نجلس مع البنات ونفلها ونحلل دبي وايامها..
وراحوا لعند الشله..
رغد: ريم ابتسمي للكاميرا..
ريم ضحكت لما طلعت اسنانها اللي ورى: تشيييييز..
رغد: انا قلت ابتسمي مو اكشف على اسنانك..
ريم: هذي الابتسامه دوخت ناس وناس..
العنود: اكيد عميان هههههههههه..
عبير: هههههه حلوه يا العنود اول مره تقولين شي حلو..
الهنوف: ما تلاحظين يا ريم انهم يهزؤنك وانتي ساكته ..
ريم: انا اعلى منهم مستوى فا ما اعطي أي احد وجه.. فهمتي.
العنود: بنت الوزير وانا ما ادري...
ريم: اكبر يا حبيتي اكبر...انا ريم بنت عبد العزيز فاهمه..
عبير: عبد العزيز على العين والراس بس انتي لالا ما اتوقع..
رغد: يا حبكم للمشاكل ودي اشوفكم يوم بدون ما تتهاوشون..
ريم : تصدقين ولا مره صارت..
الهنوف: حتى انا من يوم تعرفت عليكم صرت مثلكم الا طبعا رغد قلبي...
عبير: مسكينه الا انتي اللي من يوم تعرفنا عليك واحنا مشاكل في مشاكل..
مها: تكفون راسي يعورني اسكتوا شوي سولفوا بهدوء..
العنود: بهدوء؟؟؟؟؟ غربيه هالكلمه ماهي في قاموسي..يعني ما نتبعها فهمتي.
مها: اجل انا رايحه لعند البنات يله باي..
البنات: باي...
ريم: عيب عليكم البنت ودها تجلس معانا..وانتي ابعدي هالكاميرا عن وجهي...
رغد: هذا جزاي اقول احلى الشله واصورها..
لفواعليها العنود وعبير والهنوف: يعني وش قصدك..
رغد خافت: العب عليها...عشان اضحك على وجهها بعدين..
الثلاثه: ايوه نحسب..

&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
عند العيال..
ماجد: فواز ممكن نطلع انا وياك أي مكان لحالنا...؟
فواز: ايوه اكيد..
ماجد: وش رايك نطلع عند البحر نتمشى...
فواز: يله قدام...
وطلعوا عند البحر...
فواز: يله قل وش عندك يا اخوي..محتاج شي صاير لك شي..؟
ماجد: انا ما احتاج شي بس انت تحتاج..
فواز بدهشه: انا محتاج لأيش...
ماجد: محتاج تتكلم عن نفسك وعن زوجتك وعيالك..يا اخي فضفض شوي...اذا كنت في مشكلها نحلها لك..ترى ما يصلح تجمع هموم على قلبك بالشكل هذا...
فواز: وش تبيني اقول يا ماجد..
ماجد: قول اللي في قلبك..قول لي وش تعاني منه وانا اوقف معك واساعدك..
فواز: انا يا ماجد ما عندي مشاكل ابد..وزجتي مسعدتني في حياتي و موفره كل شي لي..وايامي كلها حلوه..
ماجد: طيب ليش تعاملها كذا وكأنك ما تحبها ولا تبي تشوفها..
فواز: مو عشاني عشانها..
ماجد: يعني هي ما تبيك..
فواز: لالا بالعكس...بس ابي اغير اسلوبها..
ماجد: وش فيه اسلوبها وليش؟؟
فواز: شوف انا ما احب اتكلم عن حياتي الخاصه..بس ابتكلم معاك لانك اخوي وصديقي.. وابي رايك باللي سويته..
ماجد: اوكيه..
فواز: احم..بدور شخصيتها ضعيفه..مانتاقش وما تعترض..ما تقول..لا.... ما لها راي..الراي راي والشور شوري...بعض الاحيان احس وجودها مثل عدمها..اذا استشرتها في شي تقول نفس راي..وغير هذا مالها شخصيه..وهذا الشي ما عجبني....انا وعيالي نحتاج احد يقودنا ما نقودها وخصوصا العيال الصغار..الحين لما تقول لهم شي ما يسمعوا لها كلمه كيف لما يكبروا ..عرفت الحين ليش اعاملها كذا..
ماجد: طيب انت تعتقد ان الطريقه اللي تستخدمها صح..
فوازبثقه: ايه..
ماجد: جابت نتيجه..؟
فواز: بصراحه....لا..
ماجد: يعني غلط...طريقتك غلط .حتى انك ما صارحتها باللي تبيه..ما واجهتها بالحقيقه..مخلي البنت على عماها..
فواز: وش تيني اقول لها..
ماجد: قل لها أي شي بس لا تخليها كذا معلقه وما تدري هي وش سوت ..عشان تسوي فيها كذا...هو انت تكرهها..
فواز: اكرهها؟؟؟ اموت ولا تجي الساعه اللي اكره فيها بدور..ماجد بدور في حياتي شي كبير..تحديت الكل والجميع عشانها وتقول اكرهها..
ماجد: عشان كذا يا فواز لازم تغير طريقتك معاها..
فواز: لازم انا اللي اقولها..خلنا نخلي احد يلمح لها..
ماجد: هذا الغلط..مشاكلكم محد يتدخل فيها..انت لازم تحل المشكله اللي بينكم..ترى بدور ما تستاهل اللي تسويه فيها..كبير عليها بالمر..
فواز:ادري والله ادري بس كل هذا عشاني احبها يا ماجد..
ماجد: ادري..بس عشانك ما قلت لاحد ولا اخذت شور احد وتصرفت من نفسك..هذي النتايج..يمكن زوجتك تعيش حالة اكتئاب..
فواز: وش دراك انت؟؟
ماجد: انت ما تسمع البنات كيف يسولفون عنها..يقولون ما تتكلم ابد ولا تضحك ولا تسولف يا قاعده مع عيالها يا تفكر...
فواز: للدرجه هذي..توقعت اذا جلست مع اهلي تنبسط..
ماجد: كيف تنبسط وانت تصد وتبعد عنها قلي؟؟
فواز نزل راسه : تصدق توني اكتشف اني غبي..
ماجد: هذا درس عشان تستشير احد ..ما يصلح اللي في نفس المشكله يحلها لحاله اكيد بيكون فكره مشتت وبيشوف الموضوع من زاويه واحده..عشان كذا لازم تشارك احد معاك ترى ما فيها شي...
فواز: شكلي بروح لبدور الحين..
ماجد: على طول مشا الله..
فواز: امزح معك بخليها بكره..
ماجد حط ايده على كتف فواز: ترى مو لازم تتغير اهم شي سعادتها اوكي..
فواز: وانت صادق...

&&&&&&&&&&&&&&&&&&&&&&&&&&&&&&&&&&&&&&&&&&&&&&&


مشاري: اقول عيال خلونا نطلع مع امهاتنا شوي..
العيال: يله..
في اللحظه هذي طلعوا سعود نواف برى الشاليه للفندق ياخذون اغراضهم وحجزوا لهم على اول طياره للرياض الساعه 8 الصبح..بدون ما يقولون لاحد..
طلعوا العيال شافوا الحريم جالسين مع بعض والبنات منقسمين مجموعتين وجلسوا مع امهاتهم..
ام سليمان: حيا الله عيالي..
العيال: الله يحيك خالتي..
وكل واحد باس راس امه وجلس...وقعدوا يسولفون مع بعض..
رغد: شوفوا العيال لاحقينا حتى هنا..
العنود: اصلا ما يستغنون عنا..
الهنوف: بنات ما تلاحضون ان الجو يجنن..
ريم بخبث: اكيد يجنن والحين زاد حلاه عشان الحلوين صح..
الهنوف ما فهمت: وش قصدك..
ريم وهي تطالع بعيون الهنوف: يعني مشاري موجود وكذا..
الهنوف راتبكت: اقول روحي زين.."ولفت على رغد"..اقول رغد خلينا نتمشى..
رغد: يله..احد بيجي معانا..
عبير: انا عن نفسي مالي خلق ما اشتهيت اتحرك..
رغد: اصلا انا غاسله ايدي منك اسأل البنات..
العنود: وش رايك ريم..
ريم: لا خلينا جالسين احسن..
العنود تهمس لها: عشان حبيب القلب..
ريم: ايوه مثلك عشان حبيب القلب...
رغد كانت تبي تهرب ..ما تحب مكان مجتمعين فيه وليد وتركي..ما تحب تفكر كثير..
ومشوا مسافه وهم ساكتين..
الهنوف: رغد فيك شي...؟
رغد في نفسها"والله ما يحس فيني غيرك": لالا ما فيني شي..
الهنوف: رغد تراني من زمان ملاحظه وساكته واقول مصيرها بتقول بس طولتي..
رغد: الهنوف مافي شي عشان اقوله..
الهنوف لفت على رغد ولفتها لجهتها: رغد طالعيني..مستحيل تخفي هذا الشي عني..انتي فيك شي وما تبين تقولينه لي صح..انا بالذات صح يا رغد..
رغد لفت وجهها عن الهنوف: الهنوف ليش مو راضيه تصدقين..قلت لك ما فيه شي..
الهنوف تركت رغد: براحتك بس لا تنسين اني موجوده..الهنوف موجوده يا رغد..حتى لو كنتي متضايقه مني انا قولي لي..
رغد: لا مو منك ابد..
الهنوف: اجل من اخوي..صح يارغد من تركي..
رغد غرقت عيونها دموع: الهنوف ممكن نمشي..
الهنوف خافت على رغد: رغد تركي عامل لك شي..
رغد: الموضوع مو كذا..الموضوع اكبر من كذا...واخوك تركي ماله دخل في الموضوع...
الهنوف: بس اكيد له طرف بالموضوع..
رغد: الهنوف ما اقدر اتكلم ما اقدر...
الهنوف: ليش ابي اعرف ليش؟؟؟
رغد: محتاره يا الهنوف...محتاره"وضمت صديقتها"...تعبت يا الهنوف والله تعبت..
الهنوف ضمتها بقوه: تكلمي يا رغد..انا معاك وما راح اتخلى عنك مهما صار..
رغد اخذت نفس وهي في حضن الهنوف: الوليد ....يحبني..
الهنوف مصدومه: الوليد؟؟
رغد: ايوه يا الهنوف واعترف لي..واخوك يا الهنوف كمان اعترف لي في نفس اليوم.
الهنوف بعدت رغد وتطالع بعيونها: وكل هذا بقلبك وساكته....
رغد: خفت انك ما ترضينها لاخوك وبتقولين حددي بأسرع وقت يا وليد يا تركي..
الهنوف: صح هذا كلامي وهذا الكلام الصح..بس ما راح اضغط عليك..
رغد: وش اسوي ياالهنوف..شوري علي..
الهنوف: هالمره الشور شور قلبك يا رغد...اسألي قلبك وهو دليلك..
رغد: واذا قلت لك القلب محتار بين الميول والرحمه..
الهنوف: اختاري الميول..الرحمه ما راح تنفعك...
رغد: بس صعب اشوف اللي ارحمه مكسور وحزين والسبه انا..
الهنوف: وحرام اللي تملين له تكسرين قلبه مع انك تميلين له..
رغد: زادت حيرتي حيره..
الهنوف: وما يصلح اعرف من اللي ترحميه ومين اللي تميلين له..
رغد: عاد هذي اسمحي لي يا الهنوف..
الهنوف: لا تفكرين فيني اوكي ولا حتى في امي احنا راضين بقرارك وراح نظل صاحبات طول العمر يا قلبي..
رغد ضمت الهنوف: الله يخليك لي ولا يحرمني منك ولا يفرقنا..
الهنوف: امين..
رغد بعدت عنها: ما تلاحظين قلبناها عزاء ..
الهنوف: خلك مره ثانيه تسوينها وتخبين عني شي..
رغد ابتسمت: لالا التوبه..
وحسوا ان في احد وراهم يمشي..
الهنوف التفتت: رغد كأنا احد ورانا...وما ودي التفت..
رغد: يمه لا تخوفيني..اكيد وحده من البنات...
الهنوف: لا تلتفتين..
رغد: خليني اشوف..
الهنوف: اخاف جني..
رغد خافت: جني لالالا وش جني لا تخوفيني...
الهنوف: خلينا نسرع احسن..
رغد: يله...
وصاروا يسرعون واللي وراهم يسرع وهو ساكت....



@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@ @@@@@@@@@@@@@@@@@@@@@@@@@
" نهاية البارت "


تحيآتي:F U N K A T~